2019-12-25 10:43:46        cri

Bisa kididdigar da ma'aikatar harkokin al'adu da yawon shakatawa ta kasar Sin ta fidda jiya Talata, an ce, cikin watanni 9 na farkon shekarar 2019, kamfanonin dake shafar raya al'adu kimanin dubu 56, sun sami kudin shiga RMB biliyan dubu 62, adadin da ya karu da 7.6% idan aka kwatanta da na makamancin lokacin bara.

Jami'in ofishin raya ayyuka na ma'aikatar harkokin al'adu da yawon shakatawa ta kasar Sin Gao Zheng ya bayyana cewa, cikin farkon watanni 9 na bana, akwai mutanen waje sama da miliyan dari 1 da suka zo yawon shakatawa a Sin, adadin da ya karu da 4.7%, kana adadin Sinawa da suka tafi waje domin yawon shakatawa ya kai kimanin miliyan 120, adadin da ya karu da 8.5%.

Ban da haka kuma, a shekarar 2019, kasar Sin ta ba da taimako wajen gudanar da manyan shirye-shiryen hadin gwiwar kasa da kasa, a fannin al'adu da na yawon shakatawa bisa shawarar "ziri daya da hanya daga" guda 85, a kasashe da yankuna guda 20, wadanda suka shafi sana'ar al'adu ta yanar gizo, da sana'ar al'adu da wasan kwaikwayo, da sana'ar na'urorin yawon shakatawa da al'adu da dai sauransu. (Maryam)