2019-12-10 11:09:06        cri

Shugaban Najeriya Muhammadu Buhari, ya gabatar da sunan Muhammad Nami, a matsayin wanda zai nada sabon shugaban hukumar tattara haraji na kasar ko FIRS, ga majalissar dattijan kasar domin tabbatarwa. Shugaba Buhari ya gabatar da Nami ne a matsayin wanda zai maye gurbin Tunde Fowler, wanda wa'adin aikin sa ya kare a jiya Litinin.

Wata sanarwa da fadar shugaban kasar ta fitar, ta bayyana sabon shugaban hukumar ta FIRS a matsayin gogaggen ma'aikaci, masanin tattara haraji, akawu kuma mai ilimin jagoranci, wanda ya jima yana aiki a wannan fanni. Nami, ya shafe kusan shekaru 30 yana aiki a fannin tantance hada hadar kudade, da karbar haraji da dai sauran su. (Saminu)