2019-11-15 20:32:37        cri

Kakakin ma'aikatar harkokin wajen kasar Sin Geng Shuang, ya shaidawa taron manema labarai da aka gudanar a yau Jumma'a cewa, kasar sa ta nuna matukar bacin rai da ma Allah wadai da harin da aka kaiwa darektar harkokin shari'a ta yankin musamman na Hong Kong na kasar Sin a Burtaniya.

Don haka, kasar Sin ta bukaci bangaren Burtaniya, da ya gaggauta gudanar da bincike kan lamarin, ya kuma yi kokarin damke wadanda suka aikata wannan danyen aiki, don a gurfanar da su a gaban kuliya.

A jiya ne dai, wasu mutane da suka rufe fuskokinsu, suka kaiwa Zheng Ruohua, sakartariyar sashen shari'a ta yankin musamman na Hong Kong na kasar Sin hari, lokacin da take halartar wani biki a London har ta ji rauni. Yanzu haka tana samun kulawa a asibiti. (Ibrahim)