2019-07-19 10:06:12        cri

Hukumar kula da 'yan gudun hijira ta MDD (UNHCR) ta bayyana cewa, kimanin 'yan gudun hijira miliyan 10.5 ne suka samu kulawar kiwon lafiya ta hanyar shirye-shiryen samar da lafiya ga jama'a na hukumar a shekarar da ta gabata, duk da adadi mafi yawa na mutanen da aka raba da muhallansu a duniya da yadda har yanzu matsalar 'yan gudun hijira ke ci gaba da karuwa.

Hukumar ta bayyana cikin wani rahoton shekara-shekara dake nazarin kiwon lafiyar al'umma na duniya cewa, ita da abokan huldarta ne suka wallafa wadannan alkaluma a shekarar da ta gabata.

Rahoton ya nuna cewa, ci gaban da aka samu a shekarar 2018 da ta gabata, yawan mace-mace tsakanin yara 'yan gudun hijira 'yan kasa da shekaru biyar, wani abu mai muhimmanci a bangaren lafiya ya ci gaba da raguwa. Bugu da kari, rahoton ya bayyana muhimmin ci gaba da aka samu wajen sanya 'yan gudun hijira cikin tsare-tsaren kiwon lafiya na kasa.

Rahoton ya ce, wasu kasashe na kokari matuka wajen fadada damammakin sanya 'yan gudun hijira cikin shirye-shiryen inshorar kiwon lafiya da sauran matakan ba da kariya ga ginshikan rayuwa.

Yanzu haka, galibin 'yan hijira a kasashe 37 da suke samun mafaka, suna samun allurar riga kafi da magungunan tarin fuka, da na kanjamau da zazzabin cizon sauro daidai da 'yan kasashen.(Ibrahim)