A cikin jawabin da ya gabatar Jiya Jumma'a, a wajen babbar muhawarar kwamitin kula da harkokin kwance damarar soja da tsaron kasa da kasa na babban taron MDD karo na 72, Wang Qun ya ce, a halin yanzu ana fuskantar wasu manyan sauye-sauye da ci gaba tare kuma da sabbin kalubale a fannin tsaro a fadin duniya. A don haka, akwai bukatar kasa da kasa su bullo da sabbin dabarun inganta harkokin tsaro a duniya.
Jami'in ya ruwaito Shugaban kasar Sin Xi Jinping na bada shawarar kasa da kasa su yi hadin-gwiwa kafada da kafada, da neman ci gaba mai dorewa, a wani kokari na kafa sabuwar dangantaka tsakanin kasashen duniya, da dukkan kasashen za su mora. Wang Qun ya kara da cewa, wadannan ra'ayoyi na shugaba Xi Jinping, sun kafa wata alkibla ga yadda za'a tabbatar da zaman lafiya da kwanciyar hankali a duniya, da lalubo hanyar da kasashen duniya za su bi wajen kiyaye zaman lafiya da tabbatar da kwanciyar hankali. Wang ya ce, kasa da kasa za su iya yin koyi gami da tallata wadannan ra'ayoyi na gwamnatin kasar Sin a fannin inganta yanayin tsaro.(Murtala Zhang)
