Kwamitin dake kula da 'yancin dan adam na kungiyar tarayyar Afrika (AU), dake ziyarar aiki a kasar Burundi tun daga ranar 8 ga watan Disamba, ya tabbatar a ranar Litinin cewa, an samu laifuffukan keta hakkin dan adam da kuma cafke mutane ba bisa doka ba, wannan kuma tun lokacin sanarwar neman wa'adi na uku da ake adawa na shugaba Pierre Nkurunziza a ranar 25 ga watan Afrilun shekarar 2015.

Binciken na farko shi ne an samu tashen tashen hankali na keta hakkin dan adam a kasar Burundi musammun ma kisa, tsare mutane ba bisa doka ba kuma dalilin rashin doka da oda, da kuma rashin hukunta masu aikata laifin, in ji madam Pancy Makula, shugabar wannan kwamiti a gaban manema labarai bayan wata tattaunawa tare da Gaston Sindimwo, mataimakin shugaban kasar Burundi na farko.

Madam Makula ta kuma bukaci gwamnatin Burundi da ta yi iyakacin kokarinta domin maido da zaman lafiya a cikin wannan kasa musammun ma a Bujumbura, babban birnin kasar. (Maman Ada)