Cibiyar nazarin yammacin Asiya da Afirka ta kwalejin kimiyyar zamantakewar al'umma na kasar Sin ta gabatar da rahoto kan bunkasuwar Afirka daga shekarar 2013 zuwa 2014 a jiya Talata 22 ga wata, inda ya ce, yanzu kasashen Afirka sun kawar da tasirin da rikicin hada-hadar kudi na duniya da rikicin kasashen Larabawa suka haddasa musu, da farfado da tattalin arziki da samun bunkasuwa. Mai yiwuwa saurin bunkasuwar tattalin arzikin Afirka ya karu zuwa kashi 5 cikin dari a shekarar bana da kuma badi.

Rahoton ya nuna cewa, duk da halin rashin samun ci gaban tattalin arzikin duniya da karuwar rikice-rikice da ke faruwa a nahiyar Afirka, tattalin arzikin Afirka a shekarar 2013 ya karu da kashi 4 cikin dari, wanda ya ninka sau biyu bisa na dukkan duniya. Kasashe masu samun karancin kudin shiga sun fi samun bunkasuwar tattalin arziki a Afirka, amma manyan kasashen da tattalin arzikinsu ke bunkasa a Afirka ba su samu saurin bunkasuwar tattalin arziki ba. Kuma tattalin arzikin kasashe masu samar da man fetur ya ragu a sakamakon raguwar yawan man fetur da suke hakowa, wanda ya yi kasa da kwatankwacin yawan saurin bunkasuwar tattalin arziki na Afirka. (Zainab)