A ranar Litinin ne shugaban kasar Sudan Omar al-Bashir ya gana da wakili na musamman na gwamnatin kasar Sin, mai kula da harkokin Afrika Zhong Jianhua a Khartoum.
A yayin ziyarar Zhong, ya mikawa shugaban kasar ta Sudan sakon gaisuwa daga shugaban kasar Sin Xi Jinping.
Zhong, ya kuma gabatar da godiya ga shugaban kasar na Sudan, a bisa taimakon da gwamnatin kasar ta baiwa ma'aikatan samar da man fetur a Sudan ta Kudu, inda fada ya barke a kwanan nan.
A lokacin taron, bangarorin biyu sun kuma duba gamayyarsu ta diplomasiyya tare da yin musayar ra'ayi a game da halin da ake ciki a Sudan ta Kudu. (Suwaiba)
