Wata kungiya mai zaman kanta da ke kasar Turkiya, ta bayyana a ranar Talata cewa,wasu jerin gwanon manyan motocin dakon kaya guda 40 makare da kayayyakin jin kai na kasa da kasa wadanda suka hada da abinci,magunguna, tufafi da kayayyakin dumama jika, za su tashi daga kan iyakar kasashen Turkiya da Syria a ranar Laraba.

An bayar da wannan sanarwar ce yayin taron manema labarai da aka yi a birnin Istambul na kasar Turkiya, taron da ya samu halartar mambobin kawancen 'yan adawar Syria(SNC).babbar kungiyar 'yan adawar kasar Syria da ke gudun hijira a kasashen waje da kuma wakilan kungiyar malaman addinin musulunci ta kasa da kasa.

Bayanai na nuna cewa, dukkan manyan motocin dakon kayan, sun hallara a yankunan Hatay,Gaziantep da Santiurfa da ke kan iyakan kasar Turkiya tun ranar Talata, kuma za su shiga kasar Syria ranar Laraba saboda yanayi a kasar da yaki ya daidaita ba shi da kyau a halin yanzu.

Kimanin kungiyoyin fararen hula na gida da kasa da kasa 36 ne suka shiga cikin shirin samar da kayayyakin agajin wanda gidauniyar kare 'yancin bil-adama da samar da tallafin jin kai ta kasar Turkiya(IHH) ta kirkiro da nufin ceto rayuwar bil-adama,inda aka tara kayayyakin agajin da ya kai dala miliyan 1.

A cewar rahotannin MDD na baya-bayan nan,'yan gudun hijirar kasar ta Syria sun kai miliyan 6, inda 600,000 daga cikin suna zaune ne a kasar Turkiya, kuma ana saran adadin zai kara ninkawa ya zuwa karshen shekara ta 2014.(Ibrahim)