Kungiyar tarayyar kasashen Afirka (AU) ta bayar da sanarwa a ranar Jumma'a na dakatar da kasar Masar daga cikin kungiyar bayan hambarar da Mohmammed Morsi daga mukamin shugaban kasar da sojoji suka yi.

A cikin wata sanarwar da ta bayar, hukumar kungiyar AU mai kula da harkokin zaman lafiya da tsaro, ta ce ta dakatar da kasar ta Masar da ke arewacin Afirka daga dukkan ayyukan kungiyar don matsa lambar ganin an dawo da doka a kasar. (Ibrahim)