Bayan yakin neman zaben da aka kwashe sa'o'i 60 ana yi, Michael Chilufya Sata, shugaban babbar jam'iyyar adawa ta kasar Zambia, ya samu cikar burinsa, inda ya kada shugaban kasar na da Rupiah Banda a babban zaben kasar a shekarar 2011, ta yadda ya zama shugaban kasar na 5. Amma ban da murnar samun nasara, watakila shugaba Michael Sata zai nuna damuwa kadan, ganin yadda gwamnatinsa ke fuskantar kalubaloli da yawa, wadanda suka sanya ake tababar ko kasar za ta iya ci gaba da tabbatar da kwanciyar hankali da karuwar tattalin arziki cikin sauri, yadda kasar take a shekarun baya.

Michael Sata da jam'iyyarsa ta kungiyar masu kishin kasa (PF) sun yi nasara a babban zaben kasar Zambia a wannan karo, ta yadda suka kawo karshen mulkin da jam'iyyar hada kan jam'iyyu masu bin ra'ayin dimokuradiyya (MMD) ta kwashe shekaru 20 tana ta gudanarwa, irin sauyawar yanayi da ta janyo hankalin bangarori daban daban na duniya zuwa wannan kasar mai yawan al'umma na fiye da miliyan 10 da ke kudancin nahiyar Afirka.

Bayan da Michael Sata ya ci zaben, ya sheda wa manema labaru cewa, ya fahimci kalubaloli da ke gabansa, inda ya ce, 'Hakan ta sa tamkar an kama wata hanyar cin nisan zango, inda za a gamu da matsaloli da yawa.'

1 2 3