2020-10-15 10:37:13        cri

Wasu rahotanni da aka fitar a jiya Laraba, yayin bikin baje kolin sakwanni da sadarwa na kasa da kasa na kasar Sin na shekarar 2020, sun bayyana cewa, Sin ta kai matsayi na biyu a fannin karfin tattalin arziki ta yanar gizo a duniya a shekarar 2019, bayan Amurka da ke matsayi na farko.

Kwalejin nazarin sakwanni da sadarwa ta kasar Sin ce ta fitar da wannan rahoto, bayan nazartar halin bunkasuwar kasashe da yankunan tattalin arziki na yanar gizo mafi karfi a duniya su 47, inda aka gano cewa, a shekarar 2019, yawan kudin dake shafar wadannan kungiyoyi ya kai kimanin dala triliyan 31.8, adadin da ya karu da kashi 5.4% bisa na makamancin lokaci na 2018, matakin da ya fi GDPn duniya da kashi 3.1% a wannan lokaci.

Idan an mai da hankali kan karfin tattalin arziki ta yanar gizo, Amurka tana sahun gaba a duniya, inda yawan kudin dake shafar wannan fanni a Amurka a shekarar 2019 ya kai dala triliyan 13.1. Kana kasar Sin na biye da ita a matsayi na biyu, inda kudin da ya shafi wannan fanni a kasar ya kai dala triliyan 5.2.

Kaza lika, Jamus da Japan da Birtaniya suna kan matsayi na 3 zuwa 5. Yawan kudin da wadannan kasashe dake sahun gaba a duniya daga matsayi na 1 zuwa 5 ke shafa a wannan fanni ya kai kashi 78.1% bisa na dukkanin kasashe ko yankuna mafi karfin tattalin arziki ta yanar gizo a duniya su 47. (Amina Xu)