2020-05-28 19:07:05        cri

Firaminista Li Keqiang na kasar Sin ya bayyana a yau Alhamis cewa, kasarsa na sa ran fadada hadin-gwiwa da sauran kasashen duniya, domin samun nasara a kan cutar numfashi ta COVID-19.

Game da batun asalin kwayar cutar, Li ya ce, a yanzu haka kasa da kasa sun himmatu wajen nazarin allurar rigakafin cutar, da magunguna gami da sinadarin gwajin kwayar cutar, wadanda dukkansu mallakin daukacin al'ummar duniya ne. Kasar Sin na fatan fadada hadin-gwiwa da kasa da kasa a wani kokari na samun galaba ta karshe kan wannan cutar dake addabar fadin duniya baki daya.

Firaminista Li ya kuma jaddada cewa, a halin yanzu duniya na fuskantar manyan kalubaloli a fannonin da suka shafi dakile yaduwar annobar da kuma farfado da tattalin arziki da zamantakewar al'umma, al'amarin dake bukatar hadin-gwiwa tsakanin kasa da kasa.(Murtala Zhang)