2019-12-02 14:15:45        cri

A jiya ne, aka kaddamar da bikin fina-finai na kasa da kasa karo na biyu a tsibirin Hainan na kasar Sin, wanda babban gidan rediyo da telebijin na kasar Sin wato CMG, da gwamnatin lardin Hainan ta kasar Sin suka dauki nauyin gudanar da shi tare. Yayin bikin na wannan karo, za a bayar da lambar ta zinari mai alamar kwakwa ga wanda ya zo na farko, sa'an nan membobin kwamitin bada lambobin yabo, da masu tsara fina-finan da suka shiga takarar neman samun lambobin yabo a bikin sun halarci bikin budewar.

A yayin bikin na wannan karo, za a gudanar da bukukuwa da dama, kamar bikin budewa, bikin ba da lambar yabo ta zinari mai alamar kwakwa, da bikin gabatar da fina-finai, da dandalin tattaunawa batutuwan da abin ya shafa, da bikin rufewa da kuma bayar da lambar yabo da saurnasu, za kuma a gudanar da bikin fina-finai mai inganci da ya dace da bukatu da sha'awar jama'a.

Shugaban babban gidan rediyo da telebijin na kasar Sin wato CMG Shen Haixiong ya bayyana a gun bikin budewar cewa, kasar Sin tana kokarin samun ci gaba a fannin fina-finai a sabon zamani da ake ciki. Rukunin gidan rediyo da talabijin na kasar Sin CMG zai ba da gudummawa wajen sa kaimi ga kara yin mu'amala a tsakanin jama'ar kasa da kasa ta hanyar bikin fina-finai na tsibirin Hainan. Ya ce,

"Muna fatan masu tsara fina-finai daga kasashen daban-daban na duniya za su yi kokari tare don inganta dandalin bikin fina-finai na tsibirin Hainan, da samar da gudummawa ga sha'anin tsara fina-finai na duniya, tare da sa kaimi ga raya al'umma mai kyakkyawar makoma ga dukkan bil'adama."

A yayin bikin budewar, 'yan wasan kwaikwayo da masu tsara fina-finai wasu 12 sun waiwayi tarihin harkar tsara fina-finai, tun bayan da aka kafa sabuwar kasar Sin. Inda dan wasan kwaikwayo Zhang Yi ya bayyana cewa,

"A cikin shekaru 70 da suka gabata, masu tsara fina-finai na kasar Sin sun yi kokari da samun kyakkyawan sakamako, kuma sun yi imani ga samun kyakkyawar makoma. A halin da ake ciki, yawan kudin da aka samu a fannin fina-finai a kasar Sin a bana ya zarce Yuan biliyan 60. An samu babban ci gaba a wannan sha'ani. "

An fara yin bikin fina-finai na kasa da kasa na tsibirin Hainan a shekarar 2018, wannan biki bai dade ba kasar Sin. Wannan shi ne karo na farko da aka ba da lambar zirare mai alamar kwakwa a bikin na wannan karo. An kasa fina-finan da za a ba su lambobin yabon kashi uku, wato fim na wasan kwaikwayo, da na gaskiya, da gajeren fim. Kuma fina-finai 1495 daga kasashe da yankuna 80 ne, suka shiga takarar neman samun lambar yabon. Za a bayyana sunayen fina-finan da suka yi nasara a yayin bikin rufewar tare da bayar da lambar yabon zinare mai alamar kwakwa a ranar 8 ga wannan wata.

An zabi mashahuriyyar 'yar wasan kwaikwayo ta kasar Faransa Isabelle Huppert wadda ta sha lashe lambobin yabo ta 'yar wasan kwaikwayo mafi kwarewa a matsayin shugabar kwamitin alkalai a gun bikin. Malama Isabelle ta ce,  

"A yayin bikin fina-finai na tsibirin Hainan karo na farko da aka gudanar a shekarar bara, na sadu da matasa masu tsara fina-finai na nahiyar Asiya da dama, inda muka koyi fasahohin juna. Ta hanyar fina-finai, ba fasahahin daukar fim kawai ake nunawa ba, har ma ana samar da damar haduwa da jama'a." (Zainab)