An gudanar da bikin na ranar kogin Nilu ne mai taken: "Hadin gwiwa game da batun kogi, aikine na bai daya," kungiyar mambobin kasashen kogin Nilu (NBI), sun nanata aniyar burin da suke dashi na yin amfani da kogi mafi girma a duniya don cin moriyarsa.
Da yake jawabi a lokacin bikin ranar kogin Nilun karo na 12, babban daraktan NBI, Innocent Ntabana, ya bukaci a hada karfi da karfe don yin hadin gwiwa a tsakanin mambobin kasashen domin cin moriyar kogin da ba shi kariyar da ta dace.
Ntabana yace, domin cimma nasarar amfana daga dunbun albarkatun dake tattare da kogin, ya zama tilas gamayyar kasashen dake da nasaba da kogin su yi aiki tare, domin kare martabar kogin da kiyaye shi don biyan muradun kasashen da lamarin ya shafa.(Ahmad Fagam)
