Sergei Lavrov ya bayyana haka ne jiya a babban birnin kasar Philippine, lokacin da ya gana da takwaransa na Amurka Rex Tillerson a wani bangare na jerin tarukan ministocin kungiyar kasashen kudu maso gabashin Asia wato ASEAN.
Bangarorin biyu sun tattauna kan yadda Rasha za ta tunkari takukuman da Amurka ta kakaba mata.
Cikin wata sanarwa da ya fitar ta hanun kamfanin dillancin labaran Tass, Sergei Lavrov ya ce babu yadda za a yi a ce ba a mai da martini ga takunkuman na Amurka ba, ciki har da kwace kadarorin Rashar da ta yi ba bisa ka'ida ba tun cikin watan Disamban bara.
Sai dai ya ce, duk da haka, a shirye Moscow take ta tattauna da Washington idan ta jingine matakanta na fito na fito. (Fa'iza Mustapha)
