Shugaban kasar Sin Xi Jinping, ya gana da sabuwar jagorar yankin Hong Kong mai cin gashin kan sa Lam Cheng Yuet-ngor a Talatar nan, yayin taron tattauna kan batutuwan shugabanci da ya gudana a fadar Zhongnanhai dake tsakiyar birnin Beijing.
Yayin ganawar ta su, shugaba Xi ya taya Lam murnar lashe zaben yankin Hong Kong da aka gudanar, inda ta zamo shugabar yankin ta 5 a tarihi. Kaza lika shugaban na Sin ya tabbatar mata da cewa, ta dace a duk wasu sharuddan jagoranci da ake bukata.
Shugaba Xi ya kara da cewa, cikin shekaru 36 da ta kwashe tana ayyukan hukuma, ciki hadda mukamai daban daban da ta rike a yankin na Hong Kong, Lam ta nuna kwarewa da sanin makamar aiki, da kaunar kasa da yankin na Hong Kong, ga kuma iya warware lamurra masu sarkakiya.(Saminu Alhassan)
