Jiya Talata, jami'an tsaro a Somalia sun cafke wasu mutane biyu da ake zargin 'ya'yan kungiyar Al-Shabaab ne, a wani aiki da suke na farautar wadanda ke da hannu a kisan wani sojan gwamnatin kasar.
Kwamishinan 'yan sandan yankin Benadir, Bishar Abshir Gedi, ya ce ana zargin mutanen biyu na da hannu a kisan wani jami'in soji da aka yi a lardin Yakshid ranar Litinin da dare.
Mutuwar sojan ta zo ne sa'o'i, bayan bayan mayakan Al-Shabaab sun kai tagwayen harin Bam a birnin Mogadishu ranar Litinin, inda suka yi ikirarin hare-haren sun yi sanadiyyar mutuwar mutane sama da talatin.
Sai dai har yanzu, ba a san takamaimai adadin mutanen da hare-haren ya rutsa da su ba. ( Fa'iza Mustapha)