A yammacin yau Alhamis ne, shugaba Xi na kasar Sin ya gana da firaministan Indiya Mr. Narendra Modi a birnin Xi'an a ziyarar aiki ta kwanaki 3 da yake a nan kasar Sin, inda shugaba Xi ya ce, wannan ne karon farko da ya tarbi wani shugaban wata kasar waje a garinsa na haihuwa.

A lokacin da ya kai ziyara kasar indiya a watan Satumban bara ne, shugabannin biyu suka cimma muhimman yarjejeniyoyi wajen bunkasa hadin gwiwa bisa manyan tsare-tsare da batun gina layin dogo da yankin masana'antu, karfafa musaya da kula da kan iyakokinsu da sauran batutuwan da suka shafi kasa da kasa da shiyya-shiyya.

A jawabinsa Mr. Modi ya yi imanin cewa, wannan ziyara za ta bunkasa hadin gwiwar bangarorin biyu wadda za ta kai ga cimma sabon ci gaba.

A gobe ne ake sa ran Mr Modi zai gana da takwaransa na kasar Sin Li Keqiang da shugaban majalisar wakilan jama'a Zhang Dejiang a nan birnin Beijing. (Ibrahim Yaya)