Duk da cewa al'ummar kasar Brazil da dama sun nuna rashin gamsuwa da gudanar gasar cin kofin duniya da ake bugawa yanzu haka a kasar, yayin da wasu 'yan kasar ke burin gudanar da zanga-zanga kin jinin gasar, a hannu guda kuwa wasu manazarta na kallon gasar a matsayin irin ta ta farko a fannin wasanni a duniya, wajen kawo riba da moriya mai tarin yawa ga kasar ta Brazil. Ana dai sa ran cewa gasar zata baiwa Brazil damar samun ribar cinikayya da kimar ta ta kai dala miliyan dubu 6.

Wani labari da majiya mai tushe ya nuna cewa, a yayin gasar kamfanoni fiye da 2300, daga kasashe 104 ne suka halarci kasar Brazil domin kallon gasar ta bana. Yayin da a kuma hannu guda suke shawarwari da wakilan gwamnatin kasar, da wakilan 'yan kasuwar kasar, musamman a fannonin harkar samar da kayan abinci, da aikin gona, da injiniyoyi, da harkar yawon shakatawa da dai sauransu. Matakin da ake fatan zai kara baiwa kasar damar samun karin jari da za a zuba ma ta, da karin damar fitar da kayayyaki zuwa kasashen waje a watanni 12 masu zuwa.

An ce muhimman kamfanonin da za su yi hadin gwiwa da kasar ta Brazil su hada da na Sin, da Amurka, da Japan, da na kasashen Turai da kuma kasashen nahiyar Latin Amurka.

Gasar cin kofin duniyar dai ta zama muhimman dandali mai fa'ida wajen kafa dangantakar hadin gwiwar cinikayya a tsakanin kasar ta Brazil da kuma sauran kasashen duniya.(Zainab)