Kungiyar kawance mai fafutukar 'yanci da sauyi ta Sudan wato Freedom and Change Alliance, ta bukaci kwamitin mulkin soji na wucin gadi na kasar, ya sanya fararen hula cikin harkokin tafiyar da gwamnati.

Kungiyar ta yi kiran ne lokacin da ta gana da Abdel-Fattah Al-Burhan, shugaban kwamitin mulkin soji na kasar.

Daya daga cikin mambobin kungiyar Omer Al-Digair, ya bayyanawa manema labarai cewa, baya ga gwamnatin farar hula, suna bukatar a shigar da fararen hula cikin majalisar shugabancin kasar na wucin gadi.

Ya ce kungiyar za ta gabatar da jerin bukatunta ga shugaban na rikon kwarya a yau Lahadi.

Omer Al-Digair, ya kuma ce kungiyarsu ta bukaci kwamitin sojin ya sake fasalin hukumar tsaron kasar tare da hukunta dukkan wadanda ke da hannu a laifukan cin hanci da kashe masu zanga-zanga. (Fa'iza Mustapha)