Tsohon shugaban kasar Afirka ta Kudu Nelson Mandela na ci gaba da karbar magani a asibiti, bayan sake kwantar da shi da aka yi kwanaki 4 da suka gabata.

Fadar shugaban kasar ta Afirka ta Kudu ta bayyana gamsuwarta da irin kulawa da tsohon shugaban ke samu, tare da murmurewa da yake yi, kamar dai yadda mai magana da yawun fadar gwamnatin Mac Maharaj ya bayyanawa manema labaru a wata sanarwar da ya fitar.

Haka nan sanarwar ta rawaito shugaba Zuma na godiya ga dinbin al'ummar kasar, wadanda suka gudanar da addu'o'i na musamman ga Mandela, yayin tarukan ibadarsu na bikin "Easter", da ma ragowar al'ummomin duniya dake nuna damuwarsu bisa halin da tsohon shugaban kasar ke ciki. Har ila yau ya godewa ragowar gwamnatocin kasashen waje, saboda irin sakwannin da suke aikawa kasar tasa.

Mandela, 'dan shekaru 94, ya same kwantawa a asibiti ne a ranar 28 ga watan da ya gabata, bayan tashin wani ciwon huhu da ya dade yana fama da shi.(Saminu)