Yayin taron manema labarai da aka yi a birnin Tripoli ran 6 ga wata, ministan lura da harkokin cikin gida na kasar Libya Achour Chawali ya bayyana cewa, a daren Laraba 5 ga wata, an kai wa shugaban majalisar dokokin jama'ar kasar Mohammed Maqrif farmaki da bindiga bayan ya tashi daga taron majalisa, amma abin farin ciki shi ne, bai ji rauni ba.

Bisa labarin da aka samu, an ce, Mohammed Maqrif ya kama aikin shugaban majalisar dokokin jama'ar kasar Libya a watan Agusta na shekarar 2012, kuma yana daya daga cikin shugabanni masu lura da harkokin mulkin kasar a halin yanzu.

Wannan shi ne karo na biyu da Mr. Mohammed Maqrif ya ci nasarar tsallake rijiya da baya daga harin da aka kai masa. An taba kai masa hari a watan Janairu na shekarar 2013 yayin da yake wani otel a garin Sebha da ke kudancin Libya, inda wasu dakarun da ba a tabbatar da asalinsu ba suka harba bindigogi a otel din. A sanadiyar wannan hari, masu gadi guda uku sun jikkata, amma Mohammed Maqrif bai ji rauni ko kadan ba. (Maryam)