Babban taron da ake shiryawa karkashin hadin gwiwa tsakanin kungiyar EPHA mai zaman kanta da hukumar lafiya ta duniya za a yi shi ne a babban dakin taron MDD da ke Addis Ababa, wanda zai samu kulawa karkashin jagorancin ministan lafiya na kasar Habasha Tewodoros Adhanon.
Da yake magana da kamfanin dillancin labarai na Xinhua a ranar Litinin din da ta gabata, Mr Solomon Abebe, jami'in tsare-tsare kan harkar sadarwa na kungiyar EPHA, ya ce za a fara gudanar da babban taron tun daga ranar 23 zuwa 27 ga watan Afrilun shekara mai kamawa, wanda ake maiyar da ''dama da barazanar dake tattare da harkokin lafiya a duniya" a matsayin babban takensa.
Mr Solomon ya kara da cewa, ana sa ran ganin babban taron zai ja hankalin mutane a kalla 3000, wadanda ke hada da masu bincike kan lafiyar jama'a, malaman jami'o'i, masana kimiyya, masu fadakarwa, masu shirye-shirye, masu tsara doka da dalibai na duk duniya.
A cewar kungiyar ta EPHA, babban taron na matsayin wata babbar kungiya da za ta bada dama wajen musayar ilmi da gogewa kan lafiyar jama'a tare da bada gudummowa wajen kariya da cigaban lafiyar jama'a a matakin duniya, nahiya da kasa.(SALAMATU)
