2020-11-05 10:00:34        cri

Sakatare Janar na MDD Antonio Guterres, ya bayyana damuwa game da rikici da ake a yankin Tigray na Habasha, inda ya yi kira da a gaggauta daukar matakan shawo kan lamarin tare da tabbatar da sulhunta rikicin cikin lumana.

A jiya Laraba, Firaministan Habasha Abiy Ahmed, ya bada umarnin daukar matakan soji kan kungiyar 'yan tawaye mai rajin 'yantar da al'ummar Tigray wato TPLF dake jihar Tigray na arewacin kasar, a wani mataki na mayar da martani ga harin da aka kai wa wani sansanin soji a jiyan. Har ila yau a jiyan, majalisar ministocin kasar ta ayyana dokar ta baci na tsawon watanni 6 a yankin na Tigray dake arewacin kasar.

A makonnin baya-bayan nan, ana ta samun karuwar tankiya tsakanin jam'iyyar Prosperity ta Firaminista Ahmed da kuma kungiyar TPLF, inda dukkaninsu ke zargin juna da kokarin hargitsa kasar. (Fa'iza Mustapha)