Mahukuntan kasar Sin sun yi kira ga al'ummar kasar, da su kasance masu sanya ido, kan dukkanin wani yanayi da ka iya haifar da yaduwar cutar COVID-19, yayin da suke tafiye-tafiye, lokacin hutun kwanaki 5 na ranar ma'aikata dake tafe.

Ministan ma'aikatar raya al'adu da yawon shakatawa na kasar Luo Shugang, shi ne ya bayyana wannan umarni, yayin wani taron manema labarai da ya gudana yau Alhamis a nan birnin Beijing. Ya ce ana kira ga masu yawon bude ido, da su nemi masaukai kafin lokacin da za su isa wuraren ziyara, su kuma gabatar da rahoton lafiya na gaskiya a duk lokacin da aka bukaci hakan. Kaza lika su ba da damar a gwada zafin jikin su, tare da kaucewa gwamutsuwa da juna. (Saminu)