2019-06-27 13:44:02        cri

Darektan sashin bunkasa harkokin kasa da kasa na asusun tallafawa masu fama da talauci na kasar Sin Wu Peng ya bayyana jiya Laraba a lardin Zhejiang dake gabashin kasar cewa, asusun ya samu dimbin nasarori wajen gudanar da ayyukan hadin-gwiwa na kawar da fatara a Afirka.

Wu ya ce, tun shekara ta 2007, asusun ya fara gudanar da ayyukan tallafawa mutanen da suke da bukata a kasashen Guinea Bissau da Sudan da Habasha da Uganda da Nambiya da Ghana, tare kuma da bada taimako wajen yaki da bala'in fari a yankin kahon Afirka gami da tinkarar cutar Ebola a yammacin nahiyar.

Har wa yau, asusun ya nuna himma da kwazo wajen taimakawa kasashen Afirka rage talauci ta hanyar inganta harkokin bada ilimi, musamman a kasashen Habasha da Sudan.

Bisa alkaluman da aka fitar, kawo yanzu, asusun tallafawa masu fama da talauci na kasar Sin ya zuba tallafin kudi sama da Yuan miliyan 162 a kasashen dake tasowa sama da 20 don taimakawa mutanen da suke da bukata.(Murtala Zhang)