lafiya1910.m4a

Kasar Sin ta fara aiwatar da manufar haihuwar 'yaya biyu a ko wane iyali ce tun daga shekarar 2015, inda ta maye gurbin tsohuwar manufar haihuwar da daya na kasar. Saboda haka, karin mata da shekarunsu suka wuce 35 da haihuwa sun nemi sake haihuwar 'ya'ya, wasu daga cikinsu sun kamu da ciwon bakin ciki yayin da suka cika watanni 7 da samun ciki. Idan ba a kula da shi ba, zai yi barazana ga masu cikin da kuma 'ya'yansu. Wasu masu ciki da shekarunsu suka wuce 35 da haihuwa su kan kamu da ciwon bakin ciki cikin sauki yayin da suka cika watanni 7 da samun ciki, lamarin da ya ke sa su haihuwa kafin lokaci, da kamuwa da hawan jini, shan wuyar haihuwa da kamuwa da ciwon bakin ciki bayan haihuwa. Sauyawar yawan sinadaran Hormone a jikin masu juna biyu sakamakon samun ciki, da samun rikici cikin iyali da dai sauransu su, kan haddasa kamuwa da ciwon bakin ciki. Masu juna biyu wadanda suke fama da ciwon bakin ciki su kan kasance cikin bakin ciki, sannan ba su cin abinci ko yin barci yadda ya kamata, ba su nuna sha'awa kamar da, kuma kullum suna cikin damuwa sosai.

Likitoci sun yi kashedi da cewa, ciwon bakin ciki ya kan sanya 'ya'ya da iyayensu mata kasancewa cikin hadari. Idan masu juna biyun sun yi saurin jin haushi, kuma ba su ci abinci ko yi barci da kyau ba, zai kawo illa ga zaman rayuwarsu da aikinsu, don haka, dole ne su je ganin likita cikin lokaci, a magance tsanantar ciwon.

Likitoci sun ba da shawarar cewa, iyaye mata da suke sake samun ciki, kuma shekarunsu sun wuce 35 da haihuwa suna fuskantar karin matsin lamba a jiki da kuma zaman rayuwa. Saboda haka, kamata ya yi su kara mai da hankali da kuma kyautata tunaninsu cikin lokaci yayin da suke samun ciki. Har ila yau ya kamata iyalansu su samar da kyakkyawan yanayin jituwa a tsakaninsu. Kana kuma kamata ya yi mijinsu da mambobin iyalansu su nuna masu kauna da goyon baya ta fuskar tunani, a kokarin taimaka musu wajen tafiyar da sabbin sauye-sauye a zaman rayuwa. Haka zalika, ya fi kyau masu juna biyu su ci gaba da aikinsu kamar yadda suke yi a da, su kuma yi mu'amala da sauran mutane, muddin aikinsu ba shi da yawa kuma suna cikin koshin lafiya, lamarin da ya taimaka musu samun farin ciki a duk lokacin samun ciki. (Tasallah Yuan)