An kaddamar da gagarumin bikin nuna fina-finai na kasa da kasa karo na tara jiya Asabar, a Beijing, fadar mulkin kasar Sin. Hukumar kula da harkokin fina-finai ta kasar Sin ce ta bada shawarar shirya bikin mai taken Beijing International Film Festival, kana babban gidan rediyo da talabijin na kasar wato CMG gami da gwamnatin birnin Beijing suka shirya tare. Mataimakin shugaban sashin wayar da kan al'umma na kwamitin tsakiya na jam'iyyar kwaminis ta kasar, wanda kuma shi ne shugaban CMG kana shugaban babban kwamitin shirya bikin nuna fina-finan kasa da kasa karo na tara, Shen Haixiong, shi ne ya sanar da kaddamar da bikin.

Babban gidan rediyo da talabijin na kasar Sin ya samar da fasahar sadarwa ta 5G a yayin bikin, kuma irin fasahohin sadarwar zamanin da yake amfani da su sun kara kyautata ayyukan yada labarai game da bikin.

A yayin bikin, jimilar fina-finai 775 daga kasashe da yankuna 85 ne suka shiga takarar neman samun lambar karramawa mai suna Tiantan. Kana kuma za'a nuna wasu fina-finan gida da waje kusan dari biyar a sinima 30 dake Beijing. Har wa yau, a yayin bikin, za'a kaddamar da dandalin tattaunawa kan fina-finan da suka shafi murnar cika shekaru 70 da kafa Jamhuriyar Jama'ar kasar Sin, da makon fina-finan Indiya, da sauran makamantansu. Za'a kuma bayar da babbar lambar karramawa ta Tiantan yayin da ake rufe bikin, wanda zai shafe tsawon mako daya.(Murtala Zhang)