Tawagar wanzar da zaman lafiya ta kungiyar tarayyar Afrika dake Somalia (AMISOM) a ranar Lahadi ta sanar da cewa ta fara gudanar da ayyukan gyara titunan mota a kudancin kasar Somalia domin saukaka hanyoyin sufuri wajen gudanar da zirga zirgar mutane da jigilar kayayyaki a yankin.

Dickson Ruto, kwamandan dakarun AMISOM yace, aikin wanda ke gudana a garin Dhobley dake shiyyar Lower Jubba ana gudanar da shi ne a matsayin wani aikin hadin gwiwa tsakanin dakarun sojoji da fararen hula na AMISOM da hukumar gudanarwar yankin.

Ruto yace dakarun AU sun sha alwashin tabbatar da tsaron muhimman hanyoyin shigar da kayayyaki yankunan da kuma manyan cibiyoyin taruwar jama'a dake wajen garin Dhobley.

Mayakan 'yan ta'adda na Al-Shabab suna cigaba da takaita zirga zirgar jama'a tare da kwace ikon hanyoyin shiga yankunan, kamar yadda hukumomin yankunan da masu bada tallafin jin kai suka bayyana.