Mataimakin shugaban kwamitin sa ido kan harkokin bankuna da inshora na kasar Sin Wang Zhaoxing ya bayyana jiya Litinin cewa, sakamakon matukar kokarin da aka yi cikin shekaru biyun da suka wuce, a halin yanzu Sin na iya tabbatar da aiwatar da manufar hada-hadar kudi ta hanyar da ta dace kuma yadda ya kamata, kana, an samu nasarar tinkarar wasu hadduran dake tattare da harkokin kudade.

A wajen taron manema labarai da ofishin watsa labarai na majalisar gudanarwa ta kasar Sin ya shirya, Mista Wang ya ce, a yayin da take kokarin magance hadduran da ake fuskanta, gwamnatin kasar Sin tana nuna himma da kwazo wajen kara bude kofarta ga kasashen ketare don sanya sabon kuzari ga kasuwar kudin kasar, da inganta karfin yin takara na kasar ta fannin harkokin kudi. A baya, kasar Sin ta bullo da wasu jerin muhimman matakai 15, don fadada bude kofarta ga kasashen waje, inda a cewar Wang Zhaoxing, ana tabbatar da aiwatar da wadannan matakai yadda ya kamata.

Har wa yau kuma, baya ga wadannan matakai 15, wasu hukumomin kasar Sin na kokarin nazarin wasu sabbin matakan bude kofa ga kasashen waje.(Murtala Zhang)