Mahukuntan Najeriya sun tabbatar da rasuwar sojojin kasar 13 da 'yan sanda 2, sakamakon wani harin kwantan bauna da mayakan kungiyar Boko Haram suka yi musu, a kan hanyar Damaturun jihar Yobe, zuwa Maiduguri fadar mulkin jihar Borno.

Wata sanarwar da kamfanin dillancin labarai na Xinhua ya samu kwafin ta, ta rawaito rundunar sojojin kasar na cewa, maharan sun farwa jami'an tsaron ne a daren ranar Litinin.

Wannan hari dai ya biyo bayan wani harin da mayakan kungiyar suka kaiwa sansanin sojojin kasar dake Kukareta na birnin Damaturun jihar Yobe, jihar dake arewa maso gabashin kasar, wanda shi ma ya auku a ranar ta Litinin.