Shugaban kasar Sin Xi Jinping ya gana da takwaransa na kasar Amurka Donald Trump jiya Asabar, 1 ga wata a birnin Buenos Aires na kasar Argentina, inda shugabannin biyu suka yi musayar ra'ayi tare da cimma matsaya kan dangantakarsu da wasu batutuwan kasa da kasa dake jan hankalinsu duka. Shugabannin biyu sun amince cewa, za su fadada hadin-gwiwarsu bisa tushen samarwa juna moriya, da daidaita sabanin ra'ayinsu bisa tushen mutunta juna, a wani kokari na ciyar da dangantakar kasashensu gaba.

Xi da Trump sun amince cewa, za su dakatar da sanyawa juna sabon harajin kwastam, inda suka bukaci kungiyoyin jami'an tattalin arziki da cinikayyar kasashensu, su gaggauta gudanar da shawarwari, da cimma yarjejeniya tsakaninsu don kokarin cire harajin kwastam da suka kara wa juna.

Kasar Sin tana fatan kara bude kasuwarta da fadada shigar da kayayyaki daga kasashen waje, don daidaita matsalolin cinikayyar dake tsakaninta da Amurka. A ganinta kuma, ya kamata kasashen biyu su himmatu tare, domin maido da dangantakar tattalin arziki da cinikayyarsu bisa turba madaidaiciya, da kuma cimma moriya tare.(Murtala Zhang)