Labarin da hukumar kula da takardun hada-hadar kudi ta kasar Sin ta bayar ya yi nuni da cewa, kasar Sin na shirin kara bude kasuwar sayar da hannayen jari nau'in A ga masu zuba jari na kasashen ketare, kuma za a fara sauraron ra'ayoyin al'umma game da daftarin gyaran dokokin da abin ya shafa.

Bisa ga daftarin, masu zuba jarin da za su iya sayen hannayen jari nau'in A a kasar Sin sun hada da mutanen kasashen waje dake aiki a kasar Sin da kuma mutanen kasashen waje da suka kasance ma'aikatan kamfanonin dake sayar da nau'in hannayen jari wadanda kuma suke aiki a wajen kasar Sin.

Hukumar kula da takardun hada-hadar kudi ta kasar Sin ta bayyana cewa, matakin na iya kara fadada hanyoyin jari ga kasuwannin hada-hadar kudi ta kasar Sin, tare da kyautata tsarin kasuwannin. Sa'an nan, zai kara bude kasuwannin hada-hadar kudi ta kasar Sin ga kasashen duniya, kuma hakan na da muhimmiyar ma'ana.(Lubabatu)