Amurka ta sanyawa wasu mutane biyu 'yan kasar Koriya ta arewa takunkumi, bisa zarginsu da hannu cikin shirye-shiryen makamai masu linzami na kasarsu.

A cewar baitul malin Amurka, bisa wannan mataki, za a dakatar da su daga amfani da duk wata kadara ko dukiyarsu dake Amurka, sannan an haramtawa Amurkawa cinikayya da mutanen.

Zaman dar-dar a zirin Korea ya kai wani mataki da ba a saba gani ba a bana, inda Koriya ta arewar ta yi gwajin nukiliya da makamai masu linzami, yayin da Amurka da Koriya ta kudu ke ta gudanar da atisayen soji. (Fa'iza Mustapha)