Imad Al-Sayeh ya shaidawa kamfanin dillancin labarai na Xinhua cewa, aikin yi wa masu zabe rejista na gudana yadda ya kamata, inda ya ce kawo yanzu an yi wa mutane miliyan 1 rejista, inda kuma adadin ke kara karuwa.
A cikin watan Satumban da ya gabata ne shugaban shirin wanzar da zaman lafiya na MDD dake aiki a Libya, ya gabatar da wani shirin na kawo karshen rikicin siyasar kasar.
Shirin ya kunshi yi wa yarjejeniyar siyasar kasar na yanzu gyaran fuska, tare da gudanar da zabukan 'yan majalisu da na Shugaban kasa.
A baya bayn nan, Tunisia ta karbi bakuncin wani taro da MDD ta dauki nauyi, wanda ya gudana tsakanin wakilan jam'iyyun siyasar Libya, da nufin gabatar da gyaran fuska kan yarjejeniyar.
Tun bayan rikicin 2011 da ya hambarar da mulkin Gaddafi, Libya ke ta kokarin sauya mulki inda ake tsaka da fuskantar rikici da rarrabuwar kawuna a sanadin siyasa. (Fa'iza Mustapha)
