Hukumar lafiya ta duniya WHO, ta ce ta karbi kudaden da yawan su ya kai dalar Amurka miliyan 2, domin aikin sanya ido kan cututtuka masu yaduwa cikin sauri, da kuma bada tallafin gaggawa na kula da lafiya a matakin farko a kasar Somalia.

Wakilin hukumar ta WHO a Somalia Ghulam Popal, ya ce ana fuskantar babbar matsala ta yaduwar cututtuka musamman tsakanin mutanen da suka rasa matsugunnan su, da ma sauran marasa galihu wadanda talauci da karancin abinci mai gina jiki ke addaba.