Kafofin watsa labaran kasar sun rawaito hukumomin bada agajin jin kai na tabbatar da aukuwar wannan ibtila'i. Rahotanni sun kara da cewa, baya ga gidajen mazauna yankin, wasu 'yan yawon bude ido 350, da suka yi rajista da kamfanonin bada hidima 49, a sansanonin masu yawon shakatawa 27, ciki hadda baki da dama sun gaza fita daga yankin.
An ce shimilin lakar ya gangaro ne daga tsaunin Adyl-Su, ya kuma rufe dukkanin hanyoyin fita daga wannan yankin. To sai dai kuma yanzu haka ana daukar matakan ganin an ceto wadanda wannan lamari ya rutsa da su lami lafiya.