Rahotanni daga birnin Paris na kasar Faransa, na cewa wani mutum guda ya jikkata, sakamakon fashewar wani abu dake kunshe cikin wata wasika, a ofishin asusun IMF da ke birnin na Paris a yau alhamis.

An ce mutumin ya samu kuna a hannuwansa da kuma fuskarsa, yayin da ya bude wasikar, kamar dai yadda kafofin watsa labaran birnin suka tabbatar. Sai dai rahotannin sun ce fashewar ba ta shafi wani bangare na ginin ofishin ba.

An ce tuni 'yan sanda suka fara shirin binciken musabbanin aukuwar wannan lamari.