Yayin taron, Mista Li ya bayyana cewa, ya kamata an mai da aikin kawar da talauci da yunwa da dai raguwar wasu ayyuka a matsayin wani muhimmin aiki a gaban kome, da sa kaimi ga a samun dauwamammen ci gaban tattalin arziki yadda ya kamata, da samun daidaito tsakanin tattalin arziki, al'umma, muhalli bisa tsari mai yakini, ta yadda za a fidda wata hanya mai kyau wajen samun bunkasuwar tattalin arziki mai wadata da al'umma mai ci gaba da kuma muhalli mai kyau.
Ban da wannan kuma, Mista Li ya jaddada cewa, ya kamata a nace ga hadin gwiwa tsakanin kasashe masu wadata da masu tasowa, wanda ya zama wani muhimmin mataki, a bangare daya kasashe masu wadata ya kamata su cika alkwarinsu na goyon bayan kasashe masu tasowa da su zabi hanyar da ta fi dacewa halayyarsu don samun bunkasuwa. A wani bangare na daban kuwa, kasashe masu tasowa kuma, ya kamata su zurfafa hadin gwiwa tsakaninsu don cimma burinsu na dogaro da kansu cikin hadin gwiwa.
Mista Li ya kara da cewa, a cikin shekaru goma sha biyar da suka gabata, gwamnatin kasar Sin ta mai da muhimmanci sosai da kuma kasancewa abin koyi ga sauran kasashe domin cimma muradun karni na MDD, kuma ta samu ci gaba mai yakini wajen rage talauci, kiwon lafiya, ba da ilmi da dai sauransu. Matakin da ya sa mutane fiye da miliyan 400 sun fita daga kangin talauci, yawan yara da suka mutu masu kasa da shekaru biyar sun ragu da kashi 2 cikin 3, yayin da yawan mata masu juna biyu da suka mutu ya ragu da kashi 3 cikin 4, ban da wannan kuma, Sin ta kafa wani tsarin kula da tsofaffi da ba da tabbaci kan aikin jinya, wanda ya fi girma a duniya. Dadin dadawa Sin ta riga ta fara gudanar da ayyuka wajen tabbatar da ajandar samun dauwamammen bunkasuwa kafin shekarar 2030 a dukkan fannoni, kana kuma ta amince da shirin tabbatar da samun dauwamammen bunkasuwa kafin shekarar 2030 bisa halin da kasar Sin ke ciki, nan gaba kuma za a kaddamar da shirin, matakin da ya baiwa Sin jagoranci wajen gudanar da ayyukan kan tabbatar da shirin. (Amina)
