160928-Yadda-ake-shagulgulan-Sallah-a-nan-kasar-Sin-Sanusi.m4a

A ranar Litinin 12 ga watan Satumban shekarar 2016 ne musulmai a sassa daban-dabab na duniya, ciki har da nan kasar Sin suka yi bikin babbar sallah ta wannan shekara, wato Sallar Lahiya

Kamar sauran kasashen musulmi na duniya haka ma a nan kasar Sin, musulmi suka yi tururuwa zuwa masallatai da ke wurare daban-daban a wannan rana don gudanar da sallah mai raka'a biyu suna sanye da sabbin tufafi cikin farin ciki da annashuwa.

Sai dai ba kamar yadda aka saba hawan Daba ko Daushe na Dawakai na kada-kade da bushe-bushe a lokutan sallah a kasashenmu na Afirka a irin wannan rana, a nan lamarin ya sha bambam kamar yadda masu iya magana ke cewa, "Allah daya gari bambam". Sai dai su ma musulmi da ke nan kasar Sin kan yi irin nasu shagulgulan, baya ga ziyartar 'yan uwa da abokai da gaishe-gaishe da nau'o'in abinci da ake dafawa don murnar wannan rana.

Abu mai muhimmanci a nan kasar Sin shi ne yadda ake samar da matakan tsaro a ranakun sallar Azumi da Lahiya da ma sauran lokutan da musulmi ke gudanar da salloli a masallatai a duk fadin kasar.

Amma duk da irin bambancin da ke akwai, musulmi 'yan kasashen waje da ke nan Sin sun yi babbar sallah ta bana cikin farin ciki sai dai abin da ba za a rasa ba na kadaici, kuma masu salon magana na cewa, sallah bikin daya rana, ta tafi ta bar wawa da bashi.

Allah ya maimaita mana da alheri-Amin. (Souleymane, Saminu, Ibrahim/ Sanusi Chen)