Ma'aikatar lafiya ta kasar Kenya ta tabbatar da mutuwar mutane 216 daga watan Disambar bara zuwa yanzu a sakamakon barkewar cutar cholera.

Babban sakatare a ma'aikatar lafiyar kasar Nicholas Muraguri yace, kimanin 'yan kasar dubu 13 da 299 ne suka kamu da cutar a fadin kasar.

Sai dai yace gwamnatin kasar, ta dauki kwararan matakan dakile ci gaba da yaduwar cutar, tun bayan samun rahoton bullar cutar na farko a birnin Nairobi.

A cikin makon jiya, an samu sabbin bayanai na wadanda suka kamu da cutar kimanin 259, a wasu daga cikin cibiyoyin kiwon lafiya na kasar.

Mahukuntan kasar sun bullo da wasu sabbin dabaru na binciko wadanda suka kamu da cutar a baya bayan nan, don daukar matakan dakile cutar cikin gagggawa, sannan an samar da kayayyakin tsabtace ruwan sha da kuma killace rijioji a matsayin wani bangaere na kandagarkin yaduwar cutar.