A ranar 16 ga wata, bayan da ministan harkokin wajen kasar Rasha Sergei Lavrov ya gana da takwaransa na kasar Masar Sameh Shoukry da ke ziyara a Rasha, ya fada wa manema labaru cewa, nan ba da dadewa ba kasashen Rasha da Masar za su dawo da zirga-zirgar jiragen sama kai tsaye a tsakaninsu, suna kuma fatan Masar za ta ci gaba da kasancewa wurin da masu yawon shakatawa na Rasha za su rika ziyarta, sannan za a gaggauta warware duk matsalolin da harin ta'addanci ya haifar.

A ranar 31 ga watan Oktoban shekarar 2015 ne, wani jirgin saman fasinjan kasar Rasha kirar Kogalymavia da ya tashi daga Sharm El-Shekih a kan hanyarsa ta zuwa birnin St Petersburg na kasar Rasha, ya fadi jim kadan da tashinsa a zirin Sinai, inda fasinjoji 217 da ma'aikatan 7 dake cikin jirgin suka halaka, akasarinsu 'yan kasar Rasha.

Hukumar tsaron Rasha ta bayyana cewa 'yan ta'adda ne suka harbo jirgin. Bayan aukuwar lamarin, kasashen Rasha, Birtaniya, Faransa, Jamus da sauransu sun sanar da dakatar da zirga-zirgar jiragen samansu zuwa kasar ta Masar, matakin da ya haifar da babbar koma baya game da sha'anin yawon shakatawa na kasar Masar. (Bako)