A yayin ganawar ta su, shugaba Xi ya yi nuni da cewa, a shekarar da ta gabata, an samu muhimmin ci gaba ta fannin bunkasa hulda a tsakanin kasashen Sin da Amurka, inda har ya karbi goron gayyatar da shugaba Obama ya ba shi, na gudanar da ziyarar aiki a kasar ta Amurka, tare da samun nasara, kuma bangarorin biyu sun cimma daidaito a kan kara bunkasa dangantakar da ke tsakaninsu.
Har wa yau, shugaban ya ce, bunkasuwar huldar da ke tsakanin kasashen biyu ta dace da moriyar sassan biyu, haka kuma buri ne na daukacin kasashen duniya, don haka, ya kamata a kiyaye wannan hulda.
A nasa bangare Mr. Kerry ya ce, huldar da ke tsakanin Amurka da Sin na da matukar muhimmanci, kuma shugaba Obama na fatan kara tuntubar juna tare da shugaba Xi, don kara ciyar da huldar da ke tsakanin kasashen biyu gaba, tare kuma da kiyaye hadin gwiwar sassan biyu a harkokin duniya. (Lubabatu)
