Hukumar yaki da cutar Sida ta M.D.D wato UNAIDS ta ba da wani rahoto a jiya Talata, inda ta ce a cikin shekaru 15 da suka gabata, an samu ci gaba sosai wajen yaki da cutar Sida a duniya. A shekarar 2014, yawan mutanen da suka kamu da cutar ya kai miliyan 2, adadin da ya ragu da kashi 35 cikin 100 bisa na bara, kuma yawan mutanen da suka mutu sakamakon cutar ya kai miliyan 1.2, shi ma wannan adadin ya ragu da kashi 42 cikin 100 bisa na shekarar bara.

Rahoton ya nuna cewa, bisa shirin yaki da cutar Sida mai amfani a wasu yankuna, an ce za a samu gagarumin ci gaba wajen shawo kan cutar nan da shekara ta 2030. Ana sa ran zuwa waccan lokacin, za a samu raguwar adadin mutanen da suke mutuwa sakamakon cutar da aka kiyasta zai kai miliyan 21, kuma za a rage yawan mutanen da suke kamuwa da cutar da miliyan 28. Don kawo karshen wannan cutar da ta kawo kalubale sosai game da lafiyar jikin dan Adam, ya kamata a gaggauta daukar wasu matakai, wato a yi amfani da lissafi, don jan kunnen mutane, wadanda za su fi saurin kamuwa da cutar, kamar yadda aka fada a cikin rahoton.(Bako)