Adadin mutanen da suka mutu a cikin tagwayen fashewar boma bomai a ranar Asabar a Ankara, babban birnin Turkiya, ya karu zuwa 95, a cewar wata sanarwa ta fadar faramininsta Ahmet Davutoglu. Fashewar boma boman sun shafi wata tashar jirgin kasa, a yayin da kungiyoyin kwadago, kungiyoyin fararen hula da jam'iyyar tabbatar da demokaradiyyar ta al'ummar Turkiya, dake goyon bayan Kurdawa, suke gudanar da wani taron gangami, a cewar kamfanin dillancin labarai Dogan mai zaman kansa. Taron gangamin ya shafi nuna adawa da yakin da ake yi tsakanin gwamnatin Turkiya da mayakan 'yan aware na Kurdawa a kudu maso gabashin kasar Turkiya.

Ya zuwa yanzu babu wata kungiyar da ta dauki alhakin kai wannan harin. A cewar wasu da lamarin ya faru gaban idonsu, lamarin fashewar boma-bomai ya faru har sau biyu a filin dake gaban tashar jirgin kasa.

Shugaban Turkiya, Recep Tayid Erdogan ya yi alla wadai da wannan hari, wanda a cewarsa yake neman kawo baraka ga hadin kan 'yan kasa.

Turkiya na shirin gudanar da zabuka a ranar 1 ga watan Nuwamba, a cikin wani yanayi na tashin hankali da rikici tsakanin jam'iyyun siyasa, wadanda suka kasa kafa wata gwamnatin hadaka a yayin zabukan watan Yuni.

Sakatare janar na MDD, Ban Ki-moon ya yi allawadai a ranar Asabar da wannan harin ta'addanci na Ankara, tare da aike da ta'aziyarsa ga iyalan mamatan.

Haka kuma, a cikin wannan sanarwa ta kakakinsa, mista Ban ya nuna fatan ganin an gurfanar da masu hannu kan wannan hari gaban kuliya cikin gaggawa. (Maman Ada)