Kungiyar IS mai fafutukar kafa daular Islam ta sanar da cewar, ita ce ta kai harin kunar bakin wake a kudancin birnin Aden dake kasar Yemen wanda ya yi sanadiyyar hallaka sojoin hadin gwiwa 15 da kasar Saudiyya ke jagoranta.

A wata sanarwa da kungiyar ta IS ta fitar a shafin ta na twitter, ta ce, ita ce ta tura 'yan kunar bakin wake 4 don kai hari a otel din da Firaiministan Yemen Khaled Bahah ke zaune tare da makarraban sa da kuma jami'an tawagar sojojin kasar Saudiyya wadanda ke aiki a karkashin rundunar hadin gwiwa ta hadaddiyar daular larabawa a birnin na Aden.

Wannan dai shi ne hari na farko da kungiyar IS ta kai kan jami'an gwamnatin Yemen da kuma sojin hadin gwiwar kasashen larabawa.