Mashawarciyar shugaban kasar Amurka a fannin tsaro Susan Rice, ta ce shugaba Barack Obama zai gudanar da ziyarar aiki ta kwanaki 4 a kasashen Kenya da Habasha dake yankin gabashin Afrika.

Rice ta fadi hakan ne , yayin wani taron manema labaru a jiya Laraba a fadar White House. Ta ce shugaba Obama zai zama shugaban Amurka mai ci na farko da zai ziyarci wadannan kasashe 2.

A kasar Kenya, Obama zai yi shawarwari da shugabannin kasar, tare da halartar taron koli na masu masana'antun kasashen duniya, yayin da a Habasha kuma zai ziyarci hedkwatar kungiyar AU.

Rice ta ce, sabo da karancin lokaci, da wasu sauran dalilai na daban, Obama ba zai ziyarci garin Kogelo wanda shi ne mahaifar sa a kasar Kenya ba. (Bako)