A jiya ne fadar shugaban Faransa ta ba da wata sanarwar da ke cewa, shugaban kasar Faransa Francois Hollande da shugabar gwamnatin Jamus Angela Merkel sun tattauna ta waya da shugaban majalisar dokokin Ukraine Volodymyr Groysman game da halin da ake ciki wajen aiwatar da sabuwar yarjejeniyar Minsk da aka daddale a watan Febrairun bana.

Sanarwar ta ce, shugabannin biyu sun bayyana cewa, muddin ana son tabbatar da zaman lafiya cikin dogon lokaci a yankin gabashin kasar Ukraine, da cikakken yankin kasar, akwai bukatar a cimma matsaya guda game da yin gyare-gyare ga tsarin mulkin kasar, da kuma shirya zaben kananan hukumomi a Ukraine.

A ranar 12 ga watan Febrairun bana ne, a birnin Minsk, hedkwatar kasar Belarus, shugabannin Ukraine, Rasha, Jamus, da Faransa suka daddale yarjejeniya game da matakan da za a dauka don warware rikicin Ukraine cikin dogon lokaci, da gaggauta tsagaita bude wuta a yankin gabashin kasar. Yanzu dai an kusan kawo karshen tashin hankalin da ke faruwa a galiban yankunan gabashin kasar, amma kwanan baya, halin da ake ciki a yankin gabashin kasar ya ci gaba da tsananta, inda aka ci gaba da yin musayar wuta tsakanin sojojin gwamnatin da dakarun da ke adawa da ita.(Bako)