'yan sanda a Nigeriya sun tabbatar a ranar jumma'an nan cewa mutane kusan 10 suka rasu sakamakon harin 'yan kunar bakin wake har sau biyu a Maiduguri babban birnin jihar Borno dake arewa maso gabashin kasar a ranar alhamis.

Harin kunar bakin waken na farko ya auku ne a kauyen Malari akan hanyar Bama-Kunduga wata mata ce ake zargin ta daure bama baman a jikin ta sannan ta tada shi inda nan take ta hallaka kanta da wadansu mutane guda 7 da tsautsayin ya rutsa da su in ji Kwamishinar 'yan sandar jihar Aderemi Opadokun a hirar ta da manema labarai.

Kwamishinar ta kara da cewa bayan haka mutane 13 sun ji rauni an kuma garzaya da su asibiti.

Sai hari na biyu kuma da ya auku akan titin Alao Dam kusa da hanyar Bama –Kunduga shi ma wata mata ce ake zargin ta nade bam din a jikin ta inda nan take data tayar ta hallaka kanta tare da wadansu mutane 3 dake kusa.